ദക്ഷിണാഫ്രിക്കയ്ക്കെതിരായ ഒന്നാം ഏകദിനത്തിന് പിന്നാലെ പ്രതികരണവുമായി ഇന്ത്യൻ സൂപ്പർ താരം വിരാട് കോഹ്‍ലി. താൻ ക്രിക്കറ്റ് കളിക്കാൻ എവിടേയ്ക്കെങ്കിലും എത്തുന്നുണ്ടെങ്കിൽ 120 ശതമാനം ആവേശത്തിലാകും അവിടേയ്ക്കെത്തുകയെന്ന് കോഹ്‍ലി പറഞ്ഞു.
'ഇന്നത്തെ മത്സരം മികച്ചയൊരു അനുഭവമായിരുന്നു. ആദ്യത്തെ 20-25 ഓവറുകളിൽ പിച്ച് ബാറ്റിങ്ങിന് അനുകൂലമായിരുന്നു. അതിന് ശേഷം പിച്ച് സ്ലോയായി. അതുകൊണ്ട് റൺസ് നേടുകയെന്നതൊഴികെ മറ്റൊന്നും ചിന്തിക്കേണ്ടെന്ന് ഞാൻ തീരുമാനിച്ചു,' കോഹ്‍ലി മത്സരശേഷം പറഞ്ഞു.
'ഒരു മത്സരത്തിന് മുമ്പായി ഞാൻ ഒരുപാട് തയ്യാറെടുപ്പുകൾ നടത്തുന്നയാളല്ല. മാനസികമായാണ് ഞാൻ കൂടുതൽ തയ്യാറെടുപ്പുകൾ നടത്തുന്നത്. ക്രിക്കറ്റ് കളിക്കാൻ കഴിയുമെന്ന് മാനസികമായി വിശ്വാസമുണ്ടാകണം. ശാരീകമായി ഞാൻ കഠിനാധ്വാനം ചെയ്യുന്നുണ്ട്. പക്ഷേ അതിന് ക്രിക്കറ്റുമായി ഇപ്പോൾ ബന്ധമില്ല. മത്സരത്തിൽ നല്ലൊരു തുട‌ക്കം ലഭിച്ചാൽ മികച്ച റൺസ് നേടാൻ കഴിയും,' കോഹ്‍ലി കൂട്ടിച്ചേർത്തു.
'എപ്പോഴും എന്റെയുള്ളിൽ ക്രിക്കറ്റ് കളിക്കാനായി വലിയ ആഗ്രഹമുണ്ട്. ഞാൻ ഒരിടത്ത് ക്രിക്കറ്റ് കളിക്കാൻ എത്തുകയാണെങ്കിൽ, 120 ശതമാനം ആവേശത്തോടെയാവും എത്തുക. റാഞ്ചിയിൽ ഞാൻ നേരത്തെ എത്തിയിരുന്നു. അത് പരിശീലനത്തിനാണ്. ഫോം കുറവാണെന്ന് തോന്നിയാൽ കൂടുതൽ പരിശീലനം നടത്തണം. ഫോം വീണ്ടെടുത്തുവെന്ന് പരിശീലനത്തിൽ തന്നെ ഉറപ്പാക്കണം. അതുപോലെ എനിക്ക് 37 വയസായി. അതിനാൽ ശരീരത്തിന് വേണ്ട വിശ്രമം നൽകേണ്ടതും അത്യാവശ്യമാണ്,' കോഹ്‍ലി വ്യക്തമാക്കി.
ദക്ഷിണാഫ്രിക്കയ്ക്കെതിരായ ഒന്നാം ഏകദിനത്തിൽ ഇന്ത്യ 17 റൺസിനാണ് വിജയിച്ചത്. മത്സരത്തിൽ ആദ്യം ബാറ്റ് ചെയ്ത ഇന്ത്യ നിശ്ചിത 50 ഓവറിൽ എട്ട് വിക്കറ്റ് നഷ്ടത്തിൽ 349 റൺസെടുത്തു. വിരാട് കോഹ്‍ലിയുടെ സെഞ്ച്വറിയുടെയും രോഹിത് ശർമയുടെയും ക്യാപ്റ്റൻ കെ എൽ രാഹുലിന്റെയും അർധ സെഞ്ച്വറിയുടെയും മികവിലാണ് ഇന്ത്യ മികച്ച സ്കോറിലെത്തിയത്.
ദക്ഷിണാഫ്രിക്കയുടെ മറുപടി 49.2 ഓവറിൽ 332 റൺസിൽ അവസാനിച്ചു. വിജയലക്ഷ്യത്തിലേക്ക് ബാറ്റുവെച്ച ദക്ഷിണാഫ്രിക്ക മൂന്നിന് 11 എന്നും പിന്നീട് അഞ്ച് വിക്കറ്റ് നഷ്ടത്തിൽ 130 റൺസെന്നും തകർന്നതിന് ശേഷമാണ് 332 എന്ന സ്കോറിലേക്കെത്തിയത്. മുൻനിരയുടെ സംഭാവനകൂടിയുണ്ടായിരുന്നെങ്കിൽ മത്സരഫലം മറ്റൊന്നാകുമായിരുന്നു.
Content Highlights: Virat Kohli said 'If I am arriving, I will make sure I am 120%'